ओलीको भिडियो हेरेपछि विद्याले दिइन् कडा जवाफ, भनिन् ’म टुलुटुलु हेरेर बस्दिनँ’

पूर्वराष्ट्रपति विद्यादेवी भण्डारीले नेकपा एमाले अध्यक्ष केपी शर्मा ओलीको पछिल्लो अभिव्यक्तिप्रति आश्चर्य प्रकट गरेकी छन्। ओलीले भण्डारी राजनीतिमा आएर चुनाव लड्दा भीम रावलको जस्तो तरिकाले हार्ने बताएको भिडियो हेरेपछि भण्डारीले यस्तो प्रतिक्रिया दिएकी हुन्। बिहीबार साँझ एमाले र एकीकृत समाजवादीका केही नेताहरूसँगको भेटमा भण्डारीले ओलीको भिडियो हेर्दै भनेकी थिइन्, “के बोल्नुभएको होला?” भेटमा सहभागी एकीकृत समाजवादीका नेता दामोदर अर्यालका अनुसार भण्डारीले आफू एमालेभित्र अन्तरसंघर्ष गर्न तयार रहेको र समग्र वाम आन्दोलनको विभाजनलाई टुलुटुलु हेरेर नबस्ने दृढता व्यक्त गरेकी छिन्। भण्डारीले एमालेले ‘जनताको बहुदलीय जनवाद’ (जबज) पनि परित्याग गर्छ कि भन्ने चिन्ता व्यक्त गर्दै पार्टीका शीर्ष नेताहरू अलोकतान्त्रिक हुँदै गएकोमा असन्तुष्टि जनाएकी छन्। उनले वामपन्थी शक्तिमा आन्तरिक लोकतन्त्र समाप्त भए जनतामा थप असन्तुष्टि बढ्ने र यसलाई रोक्न आफू जुध्न तयार रहेको बताएकी छन्। यो घटनाक्रमले एमालेभित्र भण्डारीको सम्भावित राजनीतिक पुनरागमन र आन्तरिक विवादलाई थप उजागर गरेको छ।