गुजरात टाइटन्सले डिएल मेथडमार्फत मुम्बई इण्डियन्सलाई पराजित गर्‍यो

गएराति भएको रोचक खेलमा गुजरात टाइटन्सले मुम्बई इण्डियन्सलाई डकवर्थ–लुइस (डिएल) मेथड अनुसार ३ विकेटले पराजित गरेको छ। मुम्बईले दिएको १५५ रनको लक्ष्य पछ्याउने क्रममा बर्षाले खेल अवरुद्ध भएपछि डिएल मेथड अनुसार गुजरातलाई १९ ओभरमा १४७ रनको लक्ष्य दिइयो, जुन उसले ७ विकेट गुमाउँदै हासिल गर्‍यो।

गुजरातका कप्तान शुभमन गिलले ४३ रनको योगदान दिए भने जोस बटलरले ३०, शेरफान रथरफोर्डले २८, गेराल्ड कोएत्जेले १२ र राहुल तेबातियाले अविजित ११ रन बनाए। मुम्बईका तर्फबाट ट्रेन्ट बोल्ट, जसप्रित बुमराह र आश्विनी कुमारले समान २–२ विकेट लिए भने दीपक चहरले एक विकेट लिए।

त्यसअघि मुम्बईले पहिला ब्याटिंग गर्दै २० ओभरमा ८ विकेट गुमाउँदै १५५ रन बनाएको थियो। मुम्बईका लागि विल ज्याकले ५३ रन, सूर्यकुमार यादवले ३५ र कोर्बिन बोशले २७ रन जोडे।

गुजरातका बलर साई किशोरले २ विकेट लिए भने अन्य पाँच बलरले समान एक–एक विकेट लिए। यो जितसँगै गुजरात ११ खेलमा १६ अंकसहित शीर्ष स्थानमा उक्लिएको छ। मुम्बई १२ खेलमा १४ अंकसहित चौथो स्थानमा झरेको छ।