मकवानपुर बहुमुखी क्याम्पस स्ववियु चुनाव: संयुक्त प्यानल बनाउँदै नेविसंघ-अनेरास्ववियु, प्रतिस्पर्धा रोचक

मकवानपुर बहुमुखी क्याम्पसको स्ववियु निर्वाचनमा अखिल क्रान्तिकारीबाट उम्मेदवारी दिएका दुई विद्यार्थी, बुद्ध बहादुर ब्रम्हु र रामकृष्ण घोरासैनीले आफ्नो उम्मेदवारी फिर्ता लिएका छन्।

चैत्र ५ गते हुने स्ववियु निर्वाचनमा अनेरास्ववियु र नेविसंघले संयुक्त प्यानल बनाएर प्रतिस्पर्धा गर्ने निर्णय गरेपछि ब्रम्हु र घोरासैनीले एक विज्ञप्ति जारी गर्दै आफूहरूको उम्मेदवारी निष्क्रिय रहेको घोषणा गरेका हुन्। उनीहरूले नेविसंघ र अनेरास्ववियुका साझा उम्मेदवार प्रसिद्ध रेग्मीलाई समर्थन गर्ने उल्लेख गरेका छन्।

मकवानपुर बहुमुखी क्याम्पसको स्ववियु अध्यक्ष पदका लागि तीन प्रतिस्पर्धी छन्। नेविसंघ र अनेरास्ववियुका साझा उम्मेदवार प्रसिद्ध रेग्मी, अखिल क्रान्तिकारीका छोइसाङ लामा स्यान्ताङ, र स्वतन्त्र उम्मेदवार पुष्कर घिमिरे चुनावी प्रतिस्पर्धामा छन्।

अनेरास्ववियु र नेविसंघको गठबन्धनले निर्वाचनमा बलियो प्रभाव पार्ने अनुमान गरिएको छ। अखिल क्रान्तिकारीका उम्मेदवार स्यान्ताङ भने एक्लै प्रतिस्पर्धा गरिरहेका छन्, जसले निर्वाचनको प्रतिस्पर्धालाई रोचक बनाएको छ।