हेटौंडा–१६ मा स्कुटर दुर्घटना, अनिरुद्र बस्ताकोटीको निधन

हेटौंडा उपमहानगरपालिका–१६, गुरुधामचोकस्थित धरान–चतरा सडकखण्डमा भएको एक दुखद सडक दुर्घटनामा एक पैदल यात्रीको मृत्यु भएको छ। ठुलोदमारबाट हटियातर्फ जाँदै गरेको बा.प्र.०३-०४ प ९५२६ नम्बरको स्कुटरले ठक्कर दिँदा अनिरुद्र बस्ताकोटी गम्भीर घाइते भएका थिए। जिल्ला प्रहरी कार्यालय मकवानपुरका अनुसार घटनापछि घाइते बस्ताकोटीलाई उपचारको लागि चुरेहिल अस्पताल लगिएको थियो। तर अवस्था गम्भीर भएपछि उनलाई चितवन मेडिकल कलेज रिफर गरिएको थियो।

दुर्घटना हिजो साझा ७:४५ मा भएको थियो तर, चितवन मेडिकल कलेजले राति ११ बजेर ३० मिनेटमा बस्ताकोटीलाई मृत घोषणा गरेको हो। परिवार र स्थानीयबासीका लागि यो घटना अत्यन्त पीडादायी भएको छ। पैदल यात्रारत एक व्यक्तिको जीवन यति सहजै गुम्नु ट्राफिक सुरक्षा र सडक शिष्टाचारका सवालमा गम्भीर प्रश्न खडा गर्छ।

दुर्घटनामा संलग्न स्कुटर जिल्ला प्रहरीको नियन्त्रणमा रहेको छ। स्कुटर चालक सन्दिप थापा, जो हेटौंडा उपमहानगरपालिका–१७, ठुलोगँगटेका बासिन्दा हुन्, आफैं पनि दुर्घटनामा घाइते भएका छन् र हाल चुरेहिल अस्पतालमा उपचाररत छन्। चालकको उमेर अन्दाजी २७ वर्ष रहेको प्रहरी स्रोतले जनाएको छ।

यो घटनाले सडकमा बढ्दो असावधानी र गति नियन्त्रणको कमीलाई उजागर गरेको छ। सम्बन्धित निकायले सडक सुरक्षामा अझ गम्भीर ध्यान दिनुपर्ने आवश्यक छ। साथै, पैदल यात्रु तथा सवारी साधन चालकहरू दुबै पक्षले सर्तकता अपनाउनु अत्यन्त जरुरी देखिन्छ।

अनिरुद्र बस्ताकोटीप्रति श्रद्धाञ्जली अर्पण गर्दै, शोकसन्तप्त परिवारजनप्रति गहिरो समवेदना प्रकट गर्दछौं।