मकवानपुर बहुमुखी क्याम्पस स्ववियु चुनाव : प्रसिद्ध रेग्मीलाई पुष्कर घिमिरेको समर्थन

स्वतन्त्र विद्यार्थी युनियन (स्ववियु) निर्वाचनमा मकवानपुर बहुमुखी क्याम्पसमा सत्तापक्षीय गठबन्धनलाई समर्थन गर्ने क्रम तीव्र बनेको छ। विशेष गरी सभापति पदका उम्मेदवार प्रसिद्ध रेग्मीको पक्षमा अन्य उम्मेदवारहरूले समर्थन जनाएपछि उनको स्थिति बलियो बनेको छ।

अखिल (क्रान्तिकारी) का सदस्य उम्मेदवार बुद्ध बराम र रामकृष्ण घोरासैनीले अनेरास्ववियुका तर्फबाट सभापतिका उम्मेदवार रहेका प्रसिद्ध रेग्मीलाई समर्थन जनाइसकेका छन्। उनीहरूले विद्यार्थी हितका लागि सक्षम नेतृत्व आवश्यक रहेको भन्दै रेग्मीको पक्षमा खुलेका हुन्। यस घटनाक्रमपछि स्वतन्त्र उम्मेदवार पुष्कर घिमिरेले पनि रेग्मीलाई सहयोग गर्ने घोषणा गरेका छन्।

पुष्कर घिमिरे स्वतन्त्र विद्यार्थी संगठनको तर्फबाट सभापतिका उम्मेदवार थिए। उनले आफ्नो सम्पूर्ण समर्थकलाई उम्मेदवारी फिर्ता लिएको जानकारी गराउँदै प्रसिद्ध रेग्मीलाई मतदान गर्न अपिल गरेका छन्। विद्यार्थीहरूको हकहितको रक्षा गर्न सक्ने नेतृत्व रेग्मीले प्रदान गर्ने विश्वास गर्दै उनले समर्थन गरेको बताएका छन्।

प्रसिद्ध रेग्मी नेकपा एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) र नेपाली कांग्रेस निकट नेपाल विद्यार्थी संघ (नेविसंघ) का साझा उम्मेदवार हुन्। रेग्मीलाई सत्तापक्षीय गठबन्धनको समर्थन रहेको र अन्य उम्मेदवारहरू पनि उनको पक्षमा उभिएपछि उनको जितको सम्भावना बलियो देखिएको छ। आगामी निर्वाचनमा विद्यार्थीहरूको अन्तिम मतपरिणाम नै निर्णायक हुने भए पनि हालको अवस्थामा रेग्मीको प्रभाव बढ्दै गएको छ।